Зарим хүмүүс хуучинсаг хэв маягийн шошготой дарсыг үнэтэй чамин дарс гэж боддог тийм бас үгүй. Дарсыг үнэд хүргэхэд хэд хэдэн зүйлс нөлөөлдөг бөгөөд үүнд: тухайн усан үзэмний сортын олдоц байдал, түүнийг тариалсан бүс нутгийн нэр хүнд, тухайн дарсыг урласан үйлдвэрлэгчийн нэр хүнд бас туршлага, дарс нэрсэн давтагдашгүй арга барил, тухайн ургацын жилийн цаг агаар гэх мэт орно. Үүнээс гадна олон жил хадгалсан, олдворын, түүхэн дарснууд өндөр үнэтэй байдаг бөгөөд эдгээр дарсыг зарим тохиолдолд уух гэж биш хөрөнгө оруулалтын зорилгоор хүмүүс дуудлага худалдаагаар авдаг. Франц, Итали дарснууд ерөнхийдөө өдөр тутмын, өргөн хэрэглээний дарснуудаа хүртэл хуучин хэв маягаар шошгожуулж, үйсэн бөглөө хийж үйлдвэрлэдэг, энэ нь нэг талаасаа үнэтэй харагдах мэт боловч бусад орчин үеийн савлагаатай болон сүүлд гарч ирсэн шинэ дарснуудтай ижил үнэтэй байдаг. Австрали, Америк тэргүүтэй дарсны шинэ дэлхийн үйлдвэрлэгч нар дарсны өнгө үзэмжийг илүү шинэлэг, орчин үеийн, энгийн болгосон мөн эдгээр дарснуудаас ч гэсэн үнэтэй дарс байж болно гэсэн үг. Иймээс та аливаа дарсны үнэ болон бусад мэдээллийг авах бол интернет болон дарсны аппликейшнүүдийг ашиглаж байхыг зөвлөе.